fbpx

周四電影院|三浦春馬竹內結子遺作上畫 長假期邊部電影票房完勝

經歷完中秋節長假期,多啦 A 夢成功突圍上畫七日,成為今周上畫票房冠軍,仲贏埋上周冠軍兼上多七日嘅《末世綠洲》。至於今周新上畫電影有六部,包括三浦春馬及竹內結子遺作《信用欺詐師JP : 公主篇》同《新聞守護者》。

廣告

《天能》繼續成為榜首上映 29 日有近 5000 萬票房,緊接嘅有上映 42 日嘅《屍殺半島》,有超過 1600 萬票房。上周新上畫電影,《電影多啦A夢:大雄之新恐龍》食正中秋長假成功突圍,有超過 700 萬票房成為上周新上畫票房冠軍,內地電影《奪冠》亦都有超過 170 萬票房。

新上畫電影方面,《信用欺詐師JP : 公主篇》同《新聞守護者》可以話係今周必睇。作為續集《信用欺詐師JP : 公主篇》唔止比上集好睇,亦都更荒謬,但相信睇過前作,有留意日本影壇消息嘅,睇開日劇嘅睇呢部時會有有更深感受,因為呢部亦都係三浦春馬同竹內結子嘅遺作。故事講新加坡富豪胡雷盟突然離世,佢竟然指定從未露面嘅私生女 Michelle 為繼承人,聽到呢個消息,世界各地欺詐師當然蜂擁而至,長澤正美飾演嘅達子就喺街到搵來關水渚飾演嘅孤兒做 Michelle,連同東出昌大飾演嘅少爺仔等一齊潛入胡家爭產,喺胡雷盟三名子女同愛情騙子一齊夾擊下,佢哋會唔會成功呢?

廣告

新上畫嘅仲有《新聞守護者》,喺今時今日嘅香港,「記者」唔再「自由」,要由政府新聞處認可,俾埋個新聞新聞網登入帳戶你先叫做記者,採訪時被打壓,用強光照鏡頭,呢部電影上得真係啱時候。《新聞守護者》改編自真實故事,故事講 1933 年充滿抱乎嘅年輕威爾斯記者,深入蘇聯禁地烏克蘭採訪,由普通新聞變成揭幕真相,繼而演變成一場生死之旅。

廣告

今個星期上映嘅電影仲有講非裔美國革命嘅《逆權庄家》、韓國講述神奇整容液令你變靚嘅《整容液》、《末路狂盜》、《冥通銀行特約: 翻生爭霸戰》及《工作細胞 特別上映版》。

Share This Article
Leave a comment