中秋節只求大家都快樂！中秋長假期，又係入戲院睇戲嘅好時間！票房方面，上周上映嘅《末世綠洲》成績唔錯，果然講末日嘅動作片係受香港人歡迎嘅。今個星期有五部新戲上畫，包括《電影多啦 A 夢：大雄之新恐龍》。
一個星期又過去，上周新上畫電影入面，由《戰狼 300 》嘅謝拉畢拿主演嘅《末世綠洲》，講彗星撞落地球，令世界即將末日，謝拉畢拿同屋企人獲安排到世界上，唯一安全嘅北極圈的格陵蘭，期間佢同屋企人分開，又被認識嘅人知道佢可以上機逃離等等，佢能唔能夠去到安全地方呢？《末世綠洲》上畫一周票房有 400 萬，上映一星期已經有呢個票房數字，可以話唔錯，至於台灣純愛電影《可不可以，你也剛好喜歡我》，票房值得更好，而家有大約 150 萬。票房冠軍繼續係上映 22 日有超過 4300 萬嘅《天能》，之後係《屍殺半島》同《幻愛》。《花木蘭》繼續表現麻麻，上映兩個星期票房只有 100 幾萬。
新上畫電影有五部，推介包括多啦 A 夢 50 周年紀念作《電影多啦 A 夢: 大雄之新恐龍》，全新故事，講大雄喺恐龍博物館到參加挖掘化石體驗時，得到一枚「恐龍蛋」化石，多啦 A 夢就用「時間布」幫化可還原，仲孵化出兩隻長有翅膀嘅新品種雙胞胎恐龍，為咗恐龍能夠生存，佢哋決定返到 6600 萬年嘅白堊紀，幫佢哋搵棲息地，點知遇著當時隕石撞擊地球，所有恐龍或許因此滅絕！
另一部有 Megan Fox 擔正嘅《南非救參任務》，講佢領隊嘅僱傭兵接到一宗任務，需要深入非州營救一位被恐怖份子綁架的州長女兒，點知被恐怖份子反擊，佢哋可唔可以殺出重圍呢？其餘上畫新戲包括法國電影《走佬小棋王》，內地電影《我和我的家鄉》及《奪冠》。
