ViuTV 皇牌節目《全民造星》來到第三輯，今次由全男班換成已經出道，男同女都有，為仔而睇《全民造星》嘅今次相信會失望，但對一部份話唔應該咁快開新一輯嘅人來講，今次全新玩法，唔再係棒新人棒「舊人」，又收唔收貨呢？今晚起逢星期一至五晚 10 點半《全民造星 3 》！
首先引用返《造星 2 》同今次《造星 3 》部份粉絲所講， MIRROR 同 ERROR 都未棒紅，點解咁快開新一輯而唔係棒紅佢哋先？《造星》系列明顯係 ViuTV 皇牌節目，亦係每年必有嘅節目，但由上輯開始有部份網民就覺得唔應該咁「急」開新一輯，來到今輯招募時同樣有一樣嘅聲音，咩叫「紅」咩叫棒完，其實無答案。節目監製花姐就話因為今年肺炎關係，好多藝人都無工作，所以改《造星 3 》賽制，搵來已經加入娛樂圈，未必有太多人認識，因為今次肺炎而無工作嘅人，希望同大家共渡時艱。今次改賽制無疑會影響睇開前兩季嘅人，始終睇開幾十個仔仔，而家要男女混合，男觀眾會唔會因為有女仔而睇，相信唔會，但改賽制另一樣好處係，對比由零開始棒一個藝人出來，今次只係助攻方式令一個人爭加曝光，加上《造星 2 》至今只簽三個人，亞軍 MC 同季軍 Oscar 自己決定唔簽約，相信可改變部份對「咁快開新一輯」嘅人嘅想法。
據知首集節目參賽者質素參差，大會決定先舉辦前哨戰，83 位參賽者需爭奪 50 個位的入圍名額，先可以正式成為《全民造星 3 》入圍者，而首集就有 Eric Kwok 、卓韻芝、Joey Tang 成為前哨戰嘅評判來評選參賽者，之後再由兩位導演林二汶同彭秀慧揀選入自己嘅一隊。《全民造星 3 》有 35 集將會播到 12 月底，之後同上兩輯一樣舉行決賽，參賽者方面包括 E-Kids 成員 Alan 林詠倫，演員顧定軒，曾經簽約 ViuTV 並為《瑪嘉烈與大衛系列 綠豆》唱主題曲嘅黃劍文。
【今晚推介節目】
? 8P on 港台電視31《鏗鏘集》
? 930P on ViuTV《暖男爸爸》
? 1030P on ViuTV《全民造星 3》
