戲院重開兩星期，多部大戲相繼上畫但表現都幾令人失望，先有票房極速破千萬嘅《屍殺半島》，可惜贏票房贏唔到口碑；另有幾經波折， 需要改劇本重拍，另一大賣超級英雄系到《X戰警》外傳《#新異種人》，輸票房輸口碑，到底係咩迫便迪士尼一定要上呢部電影呢？今周終於有真正嘅大片，海外票房大收，「今晚睇咩好」同樣俾五分滿分嘅《天能》上映，要成開畫票房冠軍，甚至一周冠軍無難度呀。
⠀
?《新異種人》表現差 票房僅 200 多萬
上周有三部新戲上畫，當中《新變種人》被睇高一線，但外國影評人一早劣評呢部電影，更指「差過《黑鳳凰》」。電影被定為《X戰警》外傳，與《黑鳳凰》比較，預算唔高都預咗，但刻意營造到 Netflix 劇集《怪奇物語》（Stranger Things）的感覺，但「怪物」、特技等比《怪奇物語》差很多，加上場景單一，故事麻麻，觀眾口碑亦都非常差，票房只係大約 200 幾萬。
⠀
?《天能》今周上畫 海外票房率先破 $1.5 億美元
今周有五部電影上畫，當中焦點一定係由基斯杜化路蘭（Christopher Nolan）執導的新作《天能》，電影可以話係武肺戲院重開後，第二部香港觀眾期待已久嘅電影，海外一致好評，全球票房亦都破 $1.5 億美元，相信會係今周票房最好，甚至呢兩個月香港票房最好嘅電影。
⠀
?《打噴嚏》相隔六年再上畫 #BoycottMulan
今周上映嘅仲有原定 2014 年上畫，疑因柯震東吸毒而延至今年先上畫嘅《打噴嚏》，電影改編自九把刀同名小說，由佢自己監製同編劇，加上大家都鍾意嘅林依晨擔任女主角，古天樂公司天下一有份投資，故事講兩人活喺一個存在超級英雄嘅世界，飾演義智嘅柯震東從小到大都鍾意飾演心心姐姐嘅林依晨，喺成長過程中點樣搵到自己生存意義同「打不死」。
⠀
另外兩部電影仲有《顫．役．前》同《由菱開始》，恐怖電影《顫．役．前》講身為作家嘅女主角，原本過住成功人士嘅生活，點知一場精心設計嘅佈局，令她身陷入極度恐怖嘅境況，為咗生存，佢需要同時間競賽，拆解詭秘；《由菱開始》就係一部 2018 年拍攝嘅電影，港日合拍，選材自小蒼蘭創作嘅《媒介THE MEDIUMS》，有蒼井空客串，故事講幾個生世不同嘅人，喺命運安排下遇上咗，佢哋要作出關乎生死、命運同抉擇。話明五部電影，仲有被全球杯葛，「今晚睇咩好」獲零分推介嘅《花木蘭》，網民一早劇透晒，其實唔使睇啦。
⠀
