因肺炎而延期嘅 Marvel 電影《黑寡婦》原定今年 11 月 6 日上映，香港暫定 11 月 5 日上映，但據 Variety 報道繼華納電影《神奇女俠 1984》由原定 10 月延期至 12 月 25 日聖誕節檔期（香港暫定 12 月 24 日上映）後，迪士尼亦有意將《黑寡婦》延期。
美國以至全球戲院相繼開幕，但票房表現麻麻，當中大作《天能》至今全球票房僅收 $2 億美元，與製作費打平，表現令外界失望，香港方面截至周二票房有 $1600 多萬港幣，贏《屍殺半島》；另外《花木蘭》亦因女主角劉亦菲撐香港警察言論，以及鳴謝新疆宣傳及公安部門再度令 #BoycottMulan 升溫，美國多地以「Premiere Access」要 Disney+ 用戶額外付 $30 美金「早兩個多月優惠睇」，令用戶反感外表現亦麻麻；種種因素令片商決定將大戲延期。
Variety 亦報道迪士尼有意繼《Hamilton》、《Artemis Fowl》及《The One and Only Ivan》後，將 Pixar 新作《靈魂奇遇記》（Soul）直接於美國等地 Disney+ 上架。
