由新晉導演曾慶宏執導，毛舜筠、謝君豪、呂爵安（ Edan @ MIRROR ）、談善言、袁澧林（ Angela ）、盧瀚霆（ Anson Lo @ MIRROR ）及梁祖堯等主演的家庭題材新片《過時．過節》，將於 11 月 24 日上映，本週末起推出口碑優先場。電影主題曲《攀上天梯的螞蟻》昨晚正式發佈，歌曲由蔡德才作曲及監製，袁兩半作詞及呂爵安主唱。
上架不足 12 小時成為熱門影片第八位
由 Edan 呂爵安主唱的《過時．過節》主題曲《攀上天梯的螞蟻》日前於 Edan 的 YouTube Channel 上架，不足 12 小時即登上 YouTube 熱門影片第八位，而點擊次數已超過 25 萬，非常厲害。《攀上天梯的螞蟻》的 MV 由導演曾慶宏親自操刀，當中 Edan 以多個造型參與演出，分別在三個不同時空中摸索與屋企人的相處之道，更以難得一見的鋼琴王子造型示人，絕對是導演在演出上又一次給予 Edan 的挑戰。
MV 對導演曾慶宏意義重大
MV 拍攝當日，一向老友鬼鬼導演曾慶宏與 Edan 表現輕鬆，原來二人事前為每個鏡頭已經作充分溝通， Edan 拍攝時都全神貫注進入導演所需的狀態。這個 MV 對新導演曾慶宏尤其意義重大：「今次拍呢個 MV 好特別，因為自己嘅戲，又係我哋嘅電影主題曲，其實今次都相當難拍，大家細心啲睇，其實有三個時空，呢個人又係 Edan 、又係 Edan 嘅分身、又係阿陽，幾個人物諗緊嘅其實都係一致嘅，希望令到觀眾對電影有更多想像力， Edan 亦好信任呢件事。好開心搵嚟一個 110 年嘅古琴，好配合電影嘅氣質。」而MV中由頭帶到尾的 Edan 表示只帶着一份信任來拍攝：「我喺電影入面飾演導演本人，因為電影係改編自導演 Eric 屋企嘅故事，尤其知道咗 MV 係由 Eric 親自操刀就更加放心，因為佢拍嘅一定係最準確，所以我完全信任同投入。」
歌曲說出戲中阿陽的心聲
被問到是否要重新進入片中「阿陽」這個角色， Edan 坦言：「呢首歌就係阿陽嘅心聲，亦都係代表全家人嘅心底話，我睇詞同唱嘅時候都會見到好多家庭嘅問題喺入面，相信大家聽完都會有共鳴，好似第一句『傾偈 一秒鐘都激到暴斃』，你對住屋企人傾計，有可能一句已經覺得好嬲同好煩。我喺演釋嘅時候都投入返阿陽呢個角色嘅情緒去唱，同埋我好鍾意首歌用咗「螞蟻」去做比喻，不過點解就要留返大家入戲院感受！」而身旁的導演曾慶宏則補充：「 MV 中呈現嘅 VR 眼鏡同屋企人溝通係好重要嘅物件，希望大家睇電影之前可以記住呢個元素，可以了解到呢個仔點解需要用到副 VR 眼鏡先可以表達到自己嘅真實感受。」
Edan 首次與蔡德才合作，錄三次即收貨
參與《過時．過節》， Edan 除了與導演曾慶宏結緣，也因為獻唱主題曲，遇上兩位音樂人前輩， Edan 指：「呢首歌係蔡德才先生作歌同監製，我哋今次第一次合作，而我覺得呢首慢歌同其他歌好唔同，有一種完全唔一樣嘅感覺。其實都唔容易唱，都錄咗三次，不過我好 Enjoy 成個過程，同埋睇完試片，更加覺得首歌同電影係好配合。」
歌詞每一句都埋藏著電影的蛛絲馬跡
而導演曾慶宏則透露觀眾亦有機會在欣賞電影時，再次聽到這首歌曲，他指：「呢首主題曲會喺電影入面一個好重要嘅位置出現。我好想 Edan 唱一來係想佢用阿仔嘅角度，二來都係唱出全家人嘅心情，帶出全家人喺溝通上面對嘅困難，然後了解到點解呢家人會面對戲入面呢件事。特別多謝填詞人袁兩半先生睇完電影，再為我哋寫咗呢首詞，大家會發掘到每一句都係埋藏住電影入面嘅蛛絲馬跡，可以濃縮喺幾分鐘入面再提鍊成部電影嘅人同事，係前輩嘅功力！」
對電影中的角色感壓力
對於下星期能夠在首映禮的大銀幕欣賞到自己演出， Edan 倍感期待：「呢個角色比大家嘅感覺會同之前好唔同，不過我覺得演員就係要展現自己唔同嘅面向，阿陽某啲面向其實同 Edan 都係一樣，只係好少會將呢一面放喺大家面前，的而且確有難度，因為起初唔知應該點做，所以事前做咗好多功夫，導演、毛姐同兩位監製幫咗我好多，雖然係好難，不過完成咗呢個挑戰係好有滿足感。」；而導演曾慶宏則大爆，其實事前也擔心一向陽光的 Edan 在演出上會感吃力：「喜劇演員其實都可以係悲劇人物，佢能夠令人笑，可能係因為佢喺生活中觀察到一啲荒謬嘅事，所以我哋透過溝通，能夠勾返起 Edan 呢啲心入面嘅感受，去放喺角色入面。我同 Edan 兩個新人係一齊克服呢啲困難，無論係演繹上、咬字上、一齊不停複習，經過努力去呈現而家大家見到嘅效果。」
「今晚睇咩好」全新專區登場，即時電影電視影視消息，串流平台好節目，每日必看節目資訊！即時關注「今晚睇咩好」 Facebook 及 Instagram ，想聯絡我們或報料，即刻電郵我們。另外亦可訂閱我們電子報，接收最新資訊。
